Col 3 | WSK | STEP | Kaem nina Kristus ilak ninga maraguwuram. Buta se ninga ikia nengemang suen la duruk wonong ko mel mu ko la anirukko. Mu te Kristus Kaem ko kuting sengam mu te dagiwoso.

Colossians 3

Ana kariimet iru, se Kristus ko sokel te diram la baganakko

1 Kaem nina Kristus ilak ninga maraguwuram. Buta se ninga ikia nengemang suen la duruk wonong ko mel mu ko la anirukko. Mu te Kristus Kaem ko kuting sengam mu te dagiwoso. 2 Ninga ikia duruk wonong ko mel mu ko la anirukko, ali ko mel te me anirukko. ^{▼▼Col 3:2 Nanga ikia duruk wonong ko mel te anirukko: Mat 6:33.} 3 Mu awuk, nina ikia memek nibiring tuman ale Kristus ilak kueman, se nenenga bagara Kaem kote mu Kristus ilak wete bagasan. 4 Kristus kota nenenga marak sokel nunguning. Se nu peleruk tairuk mu, nu ninga giok se nu ilak ko nikitang te bagaralko.

5 Buta se, ali imi ko ikia munan memek nengemang te aniso mu menawuralko: saman katagot, imet kari karogo ngual ngual anira barasa, ikia memek duap duap betera, mel suen biya ko nemetam nengemang barasa, munan mu suen la menawuralko. Ni mel suen biya ko gemang motam barasoso mu ni kaem kawel karo tusam. 6 Kariimet Kaem ko kuring batagorsan ale kilek memek duap duap umutang betesan, mu noko gomang magara aringimonkowo!

7 Nina ulengkala kilek memek umutang bita se te bagakasan. 8 Bare aitak nina munan imi suen la patawu saparalko: nengemang magara, ninimi alis tuata, saki nunga bita maguwura, saki den memek te nunga maona, den memek nunguningkiri ko bala, munan mu suen la patawu saparalko.

9 Ale den kawel me ninimi maonalko. Mu awuk, nina ikia munan memek ulengkala te bagakasan mu nibiring tuman, 10 ale nina kariimet iru ko arataman. Se Kaem kariimet iru ko ninga beteram mu, nina nu turan aratalko ninga ningi ura to se ikia ningaruwoso.

11 Se Kristus te mu, nina saki Greek se saki Juda mu iwita mena; se ningimik guang batoga se me batoga iwita mena; se kari awar taira alo agi, me ikia alo agi, ura dungan kari se ura dungan kari mena iwita mena. Bare Kristus mu ana suen la nanga Biya, se nu ana suen la nanga ningi bagoso.

Ana nainimi nangamang tui se baganakko

12 Nina Kaem ko kariimet. Nu nina noko la ninga balam, ale nu ninguru ninga kueso. Buta se, munan imi guang iwita kataralko: Saki alo nengemang nungaral ale nunga saongalko. Ninimi ira kutuwural ale saki arungu lila te baga se anapeya ikup mu am gialko. 13 Bo munan me terong ningimik te bitiruk mu me nengemang ikuwurokko, am iki tualko, me ko balalko, ale noko memek am kutuwuralko. Kristus nenenga memek kutuwuram iwitatala, nina ninimi ko memek kutuwuralko. 14 Ale ninimi ko kueralko. Mu mel gira nunguningkiri, umutang te nina suen la nengemang suwanta bagaralko.

15 Kristus ko gomang lila mu nengemang ningi biyala anirukko, mu awuk, Kaem ninga auram nina biguwura te la motam suwanta lila te bagaralko. Ale nengemang ningi pempem Kaem amilmil tualko. 16 Kristus ko den mu tom suen biya nenenga ningi anirukko. Den mu ninimi kausal ale ikia ningo ningo te ninimi nedegewa talko. Ale nengemang ningi Kaem amilmil tui se, psalms, se nengeta ninga wur, se wur Korang Bur ningarso umutang ilu se lagaralko. 17 Ale anapeya balalko, ale anapeya beteralko, mu ninga Biya Jesus nup te la beteralko. Ale noko nup te Ba Kaem amilmil tualko.

Bagara suwanta ko munan

18 Nina imet alo, nina ninga kari nobowa ningi bagaralko. Umutang mu Kari Biya motam te munan diram. 19 Nina kari alo, nina ninga imet nunga kueral ale kiwem alis daong karogo mu nungumik te me beteralko, am yawarakala arungak bagaralko. ^{▼▼Col 3:18-21 Imet: 1 Cor 11:3,8-9; Eph 5:22. Kari: Eph 5:25; 1 Peter 3:7. Kuriang: Eph 6:1-4.}

20 Nina kuriang alo, munan suen biya te ninam nenet nuguring kaoralko. Mu awuk, munan umutang Kari Biya ko amilmiloso.

21 Nina nuamnuet alo, ninga kuriang nongomang maguwural se nongomang me ikuwurok ale nongomang me batagukko.

Ura dungan kariimet se nunga kotam kotam nunga den

22 Nina ura dungan kariimet alo, nina ali imi te ninga kari gira nongote ura tasan mu tom suen la nuguring bowa ningi la bagaralko. Ale tom nuna ningarkiwasan mu te la, nongomang kulukua iwita ura me iluwalko. Mena. Kari Biya Jesus ko nguanga se, nengemang ningi nunguning te ura iluwalko. 23 Anapeya ura betesan mu, ninga nengemang ninguru tualko, nina ali imi ko kari nunga ura la iluwasan iwita mena, Kari Biya ko ura iluwasan iwitata beteralko. 24 Mu awuk, nina ikisan, nu koma yawara nina ningarukkowo. Mu nina Kari Biya Kristus ko ura kariimet bagasan. 25 Bare kari awiriya memek beteso mu noko memek koma mu taukkowo. Mu awuk, Kaem mu munan koma suwanta te la kariimet nunga tuterukko.